**స్కీమ్‌లో చేరితే నెలకు రూ.10,000?**

 స్కీమ్‌లో చేరితే నెలకు రూ.10,000?

కేంద్ర ప్రభుత్వం తీపికబురు అందించేందుకు సిద్ధమౌతోంది. అటల్ పెన్షన్ యోజన స్కీమ్ ద్వారా లబ్దిదారులకు రెట్టింపు పెన్షన్ అందించాలనే లక్ష్యంతో ముందుకు వెళ్తోంది. నెలవారి పెన్షన్ మొత్తాన్ని రూ.10,000కు పెంచాలని యోచిస్తోంది. ఇదేజరిగితే లక్షల మందికి ప్రయోజనం కలుగనుంది. ఆర్థిక మంత్రిత్వ శాఖ ఇప్పటికే అటల్ పెన్షన్ యోజన స్కీమ్ ద్వారా అందించే పెన్షన్ మొత్తం పెంపు ప్రతిపాదనలపై చర్చిస్తోంది.. అసంఘటిత రంగంలోని వారికి ప్రయోజనం చేకూరేలా తగిన నిర్ణయం తీసుకోవాలని భావిస్తోంది. ప్రముఖ జాతీయ మీడియా ఎకనమిక్ టైమ్స్‌ ఈ విషయాలు వెల్లడించింది. మోదీ సర్కార్ కేవలం పెన్షన్ పెంపునకు మాత్రమే పరిమితం కాకుండా అటల్ పెన్షన్ యోజన స్కీమ్ వయసు పరిమితిని కూడా పెంచాలని యోచిస్తోంది.ప్రస్తుతం ఈ పెన్షన్ పథకంలో 18 నుంచి 40 ఏళ్ల మధ్యలో ఉన్న వారు చేరొచ్చు. వయసు పరిమితిని 50 ఏళ్లకు పెంచాలని కేంద్రం భావిస్తోంది. 'అటల్ పెన్షన్ స్కీమ్ వయసు పరిమితిని, పెన్షన్ డబ్బులను పెంచాలని ఆర్థిక మంత్రిత్వ శాఖకు సిఫార్సు చేశాం. అలాగే కేంద్రానికి దీనికి సంబంధించిన అన్ని వివరాలు అందించాం' అని పీఎఫ్‌ఆర్‌డీఏ మెంబర్ (ఫైనాన్స్) సుప్రతిం బంధోపాధ్య తెలిపారు.

అటల్ పెన్షన్ స్కీమ్‌లో చేరితే 60 ఏళ్లు వచ్చిన దగ్గరి నుంచి నెలకు రూ.1,000 నుంచి రూ.5,000 వరకు పెన్షన్ తీసుకోవచ్చు. నెలకు చెల్లించాల్సిన చందా మొత్తం వయసు, పెన్షన్ మొత్తం ప్రాతిపదికన మారుతుంది. మీరు 18 ఏళ్ల వయసులో స్కీమ్‌లో చేరితే రూ.1,000 పెన్షన్ కోసం రూ.42 చెల్లించాలి. అదే రూ.2,000 పెన్షన్‌కు రూ.84, రూ.3,000 పెన్షన్‌కు రూ.126, రూ.4,000 పెన్షన్‌కు రూ.168, రూ.5,000 పెన్షన్‌కు రూ.210 కట్టాలి.

అదే మీరు 39 ఏళ్ల వయసులో పథకంలో చేరితే రూ.1,000 పెన్షన్ కోసం రూ.264, రూ.5,000 పెన్షన్ కోసం రూ.1,318 చెల్లించాలి. అటల్ పెన్షన్ యోజన స్కీమ్‌లో చేరాలంటే భారతీయ పౌరులు అయ్యి ఉండాలి. కనీసం 20 ఏళ్లపాటు చందా కొనసాగించాలి. ఆధార్‌లో లింకైన బ్యాంక్ అకౌంట్ తప్పనిసరి.

మొబైల్ నెంబర్ కూడా ఉండాలి. బ్యాంకులు ఈ స్కీమ్‌ను ఆఫర్ చేస్తున్నాయి. బ్యాంకుకు వెళ్లి అటల్ పెన్షన్ యోజన (ఏపీవై) స్కీమ్‌లో చేరొచ్చు. మీకు పథకంలో చేరిన తర్వాత మీ మొబైల్ నెంబర్‌కు మెసేజ్ వస్తుంది.